စံပယ်ငုံ နဲ့ စံပယ်ရုံ

ဟိုး ခပ်ဝေးဝေးဆီက ရထားဥဩသံက တရုန်းရုန်းနဲ့ တိတ်တဆိတ် ပွင့်ကြွေတဲ့ စံပယ်ရုံလေးကို လှုပ်နှိုးသွားတယ်။


နံနက်ခင်းရဲ့ လေပြည်တွေက သူ့ရနံ့ကို ခိုးယူသွားမလား။ တထိတ်တလန့်နဲ့ သူ့ခမျာ မရဲတရဲ ပွင့်လို့။
ကောင်းကင် ပြာပြာမှာ ပြေးလွှားနေတဲ့ တိမ်ဖြူတွေကို မော့ကြည့်ရင်း သူ့ရဲ့ ဖြူလွှလွှ ပွင့်ဖတ်လေးတွေက နူးညံ့စင်ကြယ်မှုကိုတုပြိုင်ချင်နေလေသလား။ သူ့ပွင့်ဖတ်လေးတွေ တလွှာချင်းစီ ဖြန့်ခင်းချရင်းက တွေးနေမိသေးရဲ့။






သူ့ပွင့်ဖတ်လေးတွေ ပိုမို သန့်စင်စေမဲ့ မိုးကိုလဲ သူ မျှော်တတ်သလို နံနက်ခင်းမှာ သူ့ကို အေးမြစွာ ထိတွေ့ ခိုတွဲတတ်တဲ့ နှင်းစက်လေးတွေကိုလဲ ချစ်မြတ်နိုးတတ်ပြန်တယ်။ နေခြည်နုထွေးရဲ့ နမ်းရှိုက်မှုကိုလဲ သူက သာယာချင်သေး။

သူ့ဝတ်ဆံ ၀ါဝါလေးတွေကို ပျားပိတုန်းတွေ၊ လိပ်ပြာလေးတွေ ရစ်ဝဲ ကြည်စယ်ကြလေမလား။ အတွေးနဲ့တင် သူက ရင်ခုန်တိမ်းမူးလို့။ အခန့်မသင့်လို့ ခူးခြွေလက်တွေထဲ ပါသွားရင်တောင် ဘုရားတန်ဆောင်မှာ စီရရီ သီကုံး မွှေးမြပြခွင့်ရရင် အင်မတန် ကံကောင်းမှာပဲ။







နေရှိန်မြင့်လာလို့ သူ သိပ်ပူလောင် မလာခင် ဖြတ်ခနဲ ခုန်ချ ကြွေကျပစ်ချင်လဲ ကြွေကျလိုက်မယ်လေ။ တခဏ လောက် လောကကြီးကို အလှဆင်ခွင့် ရတယ် ဆိုတဲ့ အသိလေးနဲ့တင် သူက ကြွေကျနွမ်းခြောက်လိုက်ဖို့ ရဲဝံ့လို့ နေလေတယ်။ သူ ပွင့်ကြွေခဲ့တဲ့ စံပယ်ရုံလေးကတော့နောက်ထပ် သူ့လို စံပယ်ဖြူလေးတွေ ထပ်ပြီး ဖူးပွင့်ဝေဆာပေးလို့ နေပါအုံးမယ်။










ဘာပဲဖြစ်ဖြစ် စံပယ်ရုံလေး သူ့ကိုသတိထား အမှတ်ရသည် ဖြစ်စေ၊ လွမ်းဆွတ်သည်ဖြစ်စေ၊ မေ့လျော့သည်ဖြစ်စေ၊ သူကတော့ ခေတ္တ ပွင့်ဝေခွင့်ရသော စံပယ်ရုံလေးကို သူ နွမ်းကြွေသည်အထိ သစ္စာရှိစွာ မွှေးမြ ဖြူဆွတ်ပြလို့ နေပါဦးမည်လေ။









ပုံလေးတွေအားလုံးကို Flickr ကနေ ယူထားတာပါခင်ဗျာ။
( အိမ်က စံပယ်ရုံလေး အတွက် အမှတ်တရ)

မေတ္တာဖြင့်
မိုးကုတ်သား