“အိပ်မက်ကို ချည်တဲ့ကြိုး”

“အိပ်မက်ကို ချည်တဲ့ကြိုး”

လျှို့ဝှက်ချက်တို့နဲ့ နေ၀င်ပြီးမိုးချုပ် . . .
နေ၀င်ချိန် နေထွက်ခဲ့ခြင်းတွေလို
ကိုယ့်စိတ်ဟာမပြတ်သားဘူး။
အလွမ်းတစ်အုပ်တို့နဲ့
တောရိပ်မှာ မြူယှက်လို့နွယ်
တောင်စွယ်မှာ နေကွယ်တာလား
ချစ်ရိပ်တွေ ဝေေ၀၀ါးလို့ လေ။
မပြောဘဲ ထားတဲ့စကားလို
အဓိပ္ပာယ်တွေ မှုန်ဝါးဝါးနဲ့ . . .
မပြတ်သားရဲသူ ကိုယ့်အတွက်
နေ့တွေလတွေမှာ အလွမ်းတွေနဲ့သာ . . ။
လေတိုးရင်ညည်းတတ်တဲ့ ၀ါးရုံတောလို
မပီမသ သံစဉ်တွေ ခြွေခြွေချရင်း၊
ပန်းမခင်းတဲ့ ရွက်ကြွေတော
ချစ်သူမောမှာ စိုးစိတ်တွေနဲ့
တိုးတိတ်လို့ နေခဲ့သူ။
မိုးတွေ တိုးတိုးလေးရွာနေတယ်
နှလုံးသားငိုသံက ခြိုးခြိုးချွတ်ချွတ် . . .
ငတ်မွတ်နေတဲ့ လွတ်လပ်ခြင်းတွေ
ငါ့အလွမ်းတွေကြားမှာ
အတုန်းအရုံး ကျဆုံးလို့ ... ။
နှင်းမှုန်တွေ အုံ့ဆိုင်း ရီဝေတယ်
အေးခဲမှုတွေက နာနာကျင်ကျင်
တောင်ပံတစ်စုံကို မဖြန့်နိုင်မှတော့
ပျံသန်းဖို့ စိတ်ကူးတွေလဲ
နေလာရာ နှင်းပျောက်သလိုပေါ့။
မရေရာတဲ့ စိတ္တဇနာမ်တွေနဲ့
ဘ၀ကြီးက ပရမ်းပတာခါယမ်း . . .
ဒီလိုနဲ့ပဲ
ကြယ်မစုံတဲ့ ညတွေက
ငါ့အတွက် မထူးဆန်းတော့ပါဘူး . . . ။
မသေချာတဲ့ ၀င်သက်ထွက်သက်တွေအတွက်
ပင့်သက်တွေက အားကောင်းမောင်းသန်၊
အလင်းမဲ့ ကောင်းကင်တစ်မိုးအောက်မှာ..
ငါလေ..
ကြယ်ကြွေတွေ ကောက်ဆဲ...။

ရေးသားသူ - နှင်းမွန်၊ မိုးကုတ်သား

(ပထမဆုံး တစ်ပိုဒ်ကို ညီမလေး နှင်းမွန်ရဲ့ ဂျီတော့ခ်မှာ မြင်လိုက်လို့ ကျနော်က နောက်တစ်ပိုဒ် ထပ်ရေးတယ်။ ညီမလေးနှင်းမွန်က ဆက်ရေးလိုက်၊ ကျနော်ကရေးလိုက်နဲ့..တစ်ယောက်တစ်ပိုဒ် ရေးလာလိုက်ထာ၊ ဒီကဗျာလေး ထွက်လာပါတယ်။ အပေါ်ဆုံး အပိုဒ်က သီချင်းစာသားကြီး။ ဖြုတ်လိုက် လို့ ညီမလေးနှင်းမွန်က ပြောပါတယ်။ ကျနော်က မဖြုတ်ချင်ဘူး။ ဒါနဲ့ ဘယ်သူ့သီချင်းစာသားလဲ မေးတော့ မဒီနဲ့ ဘိုဘိုရဲ့ လွဲနေတဲ့ ဆုံမှတ်များ တဲ့။ အဲ့ဒီ သီချင်းကို နားမထောင်ဖူးတာလဲမဟုတ်. ကျနော်နားထောင်ဖူးပေမဲ့ စာသားကို မသိဘူး။ နာ့နယ်နော်.. အင်္ဂလိပ်သီချင်းမို့ စာသား မသိဘူး ဆို လူကြားလို့ ကောင်းသေးတယ်။ ခုတော့...။ ဘာပဲ ဖြစ်ဖြစ်ပေါ့ဗျာ၊ သီချင်းစာသားလေးကနေ စလိုက်တာ.. ဒီကဗျာလေး ဖြစ်လာတော့ အဲဒီအပိုဒ်ကို မဖြုတ်တော့ပဲ ဒီအတိုင်း တင်လိုက်ပါတယ်။)

မေတ္တာဖြင့်
မိုးကုတ်သား