မြိုင်မြိုင်ဆိုင်ဆိုင် လတန်ဆောင်တိုင်

တန်ဆောင်မုန်းလပြည့်ညဟာ ဆေးပေါင်းခတဲ့ညလို့လဲ ကြားဖူးရဲ့။ သူခိုးည လို့လဲ သိဖူးရဲ့။
မြို့ကလေးမှာ နေစဉ်တုန်းကတော့ ဆွေမျိုးမောင်နှမသားချင်းတွေ..၊ ကာလသား ကာလသမီးတွေ စုဆုံကြပြီး မယ်ဇလီဖူးတွေ သုပ်စားကြ၊ မီးပုံလေးတွေ ဖိုကာ မီးပုံပွဲလုပ်ကြ၊ သီချင်းဆိုကြ ကကြနှင့် ပျော်စရာ ညလည်း ဖြစ်သည်။
ည ဆယ့်နှစ်နာရီ ကျော်လျှင်တော့ ကာလသားတွေ စုပြီး သူ့အိမ် ကိုယ့်အိမ်က ခိုးလာတဲ့ ဆန်၊ ဆီ၊ ဘာညာ သာရကာတွေရယ်နဲ့တင်.. မလုံလောက်သေး၊ ရပ်ကွက်ထဲက ကြက်ခြံတွေမှာ ကြက်တွေ သွားခိုးကာ ကြက်သားကာလသားဟင်း ချက်လိုက်ကြသေးသည်။ ကြံချောင်းတွေ၊ လိမ္မော်သီးတွေကိုလည်း... အဆစ် ခိုးလာတတ်ကြပြန်သေးသည်။ ခြံရှင်တွေ မိုးအေးအေးမှာ ခေါင်းအေးအေးနှင့် ငြိမ်းငြိမ်းချမ်းချမ်း မကွေးရပဲ ကင်းစောင့်ကျသည့် ညလဲ ဖြစ်သည်။ ဒီကြားထဲမှာမှ ကျွန်တော်တို့ ကာလသားတွေက အခွင့်ကောင်း ချောင်းကာ ရအောင် ခိုးကြ၏။ တစ်ချို့ ခြံရှင်တွေကတော့ သိသိကြီးနှင့် တမင် လွှတ်ပေးကာ အခိုးခံပြီး အလှူ လုပ်ကြသည်။ တစ်ချို့ လူကြီးတွေကတော့ ပံ့သကူပစ်ကြသည်။ အထူးသဖြင့် ထီ၊ နှစ်လုံး၊ သုံးလုံး မကြာခဏ ပေါက်တတ်ကြသောသူများ..။ ပံ့သကူ ပစ်ခြင်း ကုသိုလ်ကြောင့် ထီပေါက်ကံ ပါကြောင်း အယူတွေလဲ ရှိသည် မဟုတ်လား။ ကျွန်တော်တို့ကတော့ ဘာရယ်မဟုတ်... မီးပုံးလေးတွေ ကိုယ်စီနှင့် ပံ့သကူလည်း လိုက်ရှာကြသေးသည်။ မောလာလျှင်တော့ ခိုးလာသည့် စားဖွယ်စုံနှင့် ချက်ပြုတ်ထားသည်များကို မီးပုံဘေး ၀ိုင်းဖွဲ့ထိုင်ပြီး စားသောက်ကာ ဂစ်တာတီးကြ၊ သီချင်းဆိုကြ။

ရပ်ကွက်ထဲက ခလေးတွေကလည်း `ရွှေတံခါးကြီး ဖွင့်ပါအုံး´ ဟု တစ်အိမ်ဝင်၊ တစ်အိမ်ထွက် မုန့်ဖိုးတောင်းကြသည်။

လမ်းထိပ်က သမ၀ါယမဆိုင် ဆိုင်းဘုတ်ကြီးက ရပ်ကွက်လူကြီး အိမ်ပေါက်ဝမှာ ရောက်နေပြီး... ဓာတ်ဆီဆိုင် ဆိုင်းဘုတ်က ပဲပြုတ်သည်ဆိုင်မှာ အခန့်သား..။ လမ်းဘေး ရေအိုးစင်သာမက... လေထိုးကျွတ်ဖာဆိုင်က ဆိုင်းဘုတ်တွေ၊ တာယာကွင်းတွေခမျာလည်း အငြိမ်မနေကြရပါပဲ... သူတပါးအိမ်တွေမှာ တိုးလို့တွဲလောင်းချိတ်လျက်သား..။ မိုးလင်းလာလျှင် ကိုယ့်ခြံထဲက ဘာတွေ ပါသွားလဲ... ကိုယ့်အိမ်ရှေ့ ဘာရောက်နေမလဲ ရင်ထိတ်နေရသော်လည်း ဘာကြောင့်ဖြစ်ဖြစ် ထိုညမှာတော့ ရင်ခုန်စရာလည်းကောင်း၊ ပျော်စရာလည်းကောင်းနေကြပြန်သည်။

ဒီ တန်ဆောင်မုန်း လပြည့်မှာတော့ ဒီကျွန်းကလေးသည် ထင်မှတ်ထားတာထက် ပိုပျော်စရာ ကောင်းသွားခဲ့ပါသည်။ ဒီနေ့ မနက် မိုးမလင်းတလင်းထဲက အိမ်မှာ ရှိသမျှ လူကုန် နိုးနေကြပြီ။ အရင် စနေ၊ တနင်္ဂနွေတွေလို နေ့လည် ဆယ့်နှစ်နာရီကျော်မှ ထကြသော သူများက (ကျွန်တော်အပါအ၀င်) ဆမ်ဘာဝမ် ဘုန်းကြီးကျောင်းကို၊ ထိုမှ တဆင့် ဆမ်ဘာဝမ် ပန်းခြံကို ချီတက်ကြဖို့ အားလုံး တက်ကြွနေကြသည်။ ဘယ်သူတွေ ဘယ်တော့ရောက်မှာလဲ ဖုန်းတွေ ကိုယ်စီနှင့် ဟိုလူ့ ခေါ်ပါအုံး၊ ဒီလူကို လှမ်းနှိုးပါအုံး။ ဘယ်နေရာက စောင့်မှာလဲ.. အသံတွေ မျိုးစုံ ညံစီနေကြပြီ။ ဆမ်ဘာဝမ် ဖုန်းကြီးကျောင်းသို့ ရောက်သော ဘတ်စ်ကားဂိတ်မှာပင် လူတွေက အတော်များများ ရှိနေပြီး။ စောစော သွားကြတာကိုပင် ကျွန်တော်တို့တွေ နောက်ကျနေပြီလား... စိတ်ပူသွားရသေး၏။

`စောစော သွားမှဟ၊ နေ့လည်မှဆို ဘာမှ မကျန်ပဲနေလိမ့်မယ်´

ဘေးနားက လူတစ်ချို့ဆီမှ ထိုစကားသံတွေကို တလေတည်း ကြားနေရတော့ ပြုံးမိရသေး၏။ ကျွန်တော်တို့ မောင်နှမတွေထဲက တစ်ချို့ ဘုန်းကြီးကျောင်းကို လူစုခွဲဆင်းသွားကြသည်။ မှာထားသော အစားအသောက်တွေကို စောင့်သယ်ဖို့ ဖြစ်၏။ ကျွန်တော်တို့ကတော့ ပန်းခြံထဲ တစ်ခါတည်း သွားလိုက်ကြသည်။ ကိုယ်တွေ ဘာမှ မပြင်ဆင်ရသေးခင်ပင် လူတွေ စည်နေကြပြီလား...။ ခုချိန်ထိ ကိုယ်တွေ အဖွဲ့က ဘယ်နေရာမှာ ကျမှန်းလည်း မသိ..။ နေရာထိုင်ခင်းတွေလဲ မစီစဉ်ရသေး။ သယ်လာတာတွေ ဘယ်မှာ ထားရမှာမှန်းမသိ..။ ဒီလိုနှင့် ပန်းခြံထဲ စ၀င်သွားတော့ လူအုပ်က မနည်းမနော ရောက်နှင့်နေကြပြီ..။ ပန်းခြံဝမှာကတည်းက ကြားလိုက်ရသော မြန်မာ့ဆိုင်းဝိုင်းသံကြောင့် လူက စိတ်ပျော်လို့ လာပြီ..။ မနက် ကိုးနာရီကျော်မှာပင် လူတွေက အတော် စည်ကားနေကြပြီပဲ..။

ဟော... ဟိုမှာ တွေ့ပါပြီ.....။ ဆိုင်းဘုတ်ကြီး...။
ကျွန်တော်တို့အဖွဲ့က (၂၀၁၀) ဆမ်ဘာဝမ်း တန်ဆောင်တိုင်ပွဲတော် မှာ စတုဒိသာ ကျွေးဖို့သွားနေကြခြင်း ဖြစ်သည်..။ စားပွဲခုံလေးသာ ရှိပြီး နေရာထိုင်ခင်းမှာ ကျွန်တော်တို့တွေက မရောက်ကြသေး...။ ဈေးတန်းတွေ ရှေ့မှာကတော့ လူတွေ တိုးလို့ နေကြပြီ..။

ကျွန်တော်တို့ အဖွဲ့ ရောက်လာသည်နှင့် ဘုန်းကြီးကျောင်းမှ ဝေယျာဝစ္စ အဖွဲ့သားတွေ အပြေး ရောက်လာကြပြီး လိုအပ်သမျှ ခုံတွေ၊ နေရာထိုင်ခင်းတွေ စီစဉ်ပေးကြသည်။ ဘာလိုအပ်သလဲ မေးကာ လိုလေသေးမရှိ စီစဉ်ပေးကြတော့ ကျွန်တော်တို့တွေ ဘာမှ ကြို မစီစဉ်ထားသော်လည်း အားလုံးက အဆင်သင့်ပင် ဖြစ်နေ၏။

`ကော်ဖီ တစ်ခွက်´
`ကျွန်တော်က လဖ္ဘည့်ရည် တစ်ခွက်´
`သမီးကို ကြက်ဥပူတင်းပေးပါ´
`မောင်လေးရေ.. အမတို့အတွက်က ဆနွင်းမကင်း´

ကျွန်တော်တို့ကတော့ သွားလေးတွေ အဖြီးသား..။

`ခုမှ ရေနွေးအိုးတည်ရမှာခဗျ... မုန့်တွေ မှာထားတာ မရောက်သေးလို့ ခဏလေး သည်းခံစောင့်ပေးပါခင်ဗျာ´
မျက်နှာ ပူပူနှင့် ဖြေကာ နေရပြီ။

အဖျော်ဆရာ တွေက ရေနွေးအိုး ပြေးတည်ကြ.. ညကတည်းက နွားနို့ ကြိုကာ တစ်ညလုံး လုပ်ထားရသော မလိုင်တွေကို ကုန်မသွားရ (အဲလေ) မှောက်မသွားလေအောင် သေချာ နေရာချရသေးသည်။ (မှတ်ချက်... ကော်ဖီနှင့် လဖ္ဘက်ရည် လက်မလည်အောင် ဖျော်နေရသည်မှာ မလိုင် ကျိုသူ အဖျော်ဆရာတစ်ယောက်က သူ့စေတနာတွေဟု တွင်တွင် ပြောလေသောကြောင့် တမင် ပို့စ်ထဲ မလိုင်ပါအောင် ထည့်ရေးရခြင်း ဖြစ်သည်။ ဤကား စကားချပ်)။ ခွက်တွေ အထုပ်တွေ နေရာချပြီးချိန်မှာပဲ ဘုန်းကြီးကျောင်းမှာ ဆင်းသွားသော မောင်နှမတတွေက မှာထားသောဆနွင်းမကင်း၊ ပူတင်းတွေနှင့် အတူ ရောက်လာကြပြီ။

`ကော်ဖီတွေ၊ လဖ္ဘည့်ရည်တွေ၊ ဆနွင်းမကင်း ပူတင်းတွေ ရပြီနော်´

ရေနွေးမှ မဆူသေးခင်၊ မုန့်တွေမှ မလှီးရသေးခင် ဖိုးအော်ချင် နှစ်ယောက်က ထအော်လေတော့ အဖျော်ဆရာတွေရော.... မုန့်ဝေသည့် ကျွန်တော်တို့ပါ ကျောက ချွေး ဒီးဒီး ကျအောင် အလုပ်တွေ များကုန်ကြရသည်။

`ရေနွေးဆူပြီလား၊ မြန်မြန်လေး.. မြန်မြန်လေး´

`မုန့်လှီးဖို့ ဓား အပို မပါရင် လိုက်ငှားပေးကြပါအုံး´ တွေ ဖြစ်ကုန်ကြသည်။

မှာထားသည့် ရွှေကြည် ဆနွင်းမကင်း၊ မုန်လာဥနီ ဆနွင်းမကင်း၊ ကွေကာအုပ်ဆနွင်းမကင်း နှင့် ကြက်ဥပူတင်း မုန့်တွေကတော့ ရောက်ပြီး ဘာမကြာသေး..။ မိနစ်နှစ်ဆယ်အတွင်းမှာပဲ ပြောင်သလင်းခါလို့ သွားပြီ။
မုန့်တွေ အပြေးအလွှားထပ်မှာတော့ ကြို မှာမထားလို့ မရတော့ လက်လျှော့လိုက်ရသည်။ မုန့်တွေ လှီးရင်း အမြင်မလှလို့ ဘေးဖယ်ထားသော မုန့်တွေကအစ `ရတယ်၊ ဘာမဖြစ်ဘူး.. စားလို့ ရတာပဲ´ ဆိုကာ ယူသွားကြလေတော့ ကျွန်တော်တို့မှာ ဓာတ်ပုံလေး ရိုက်ပြီး ပို့စ်မှာ တင်ဖို့ ဝေးလေစွ၊ ဘယ်မုန့်က ဘယ်လိုကောင်းတယ်ဆိုတာ ပြောဖို့ပင် မတတ်ပဲ ဖြစ်သွားရလေတော့သည်။
မုန့်လှီးသည့် ညီမကတော့ မုန့်တွေ အစောကြီး ကုန်သွား၍ ခုန်ပေါက်ကာ ပျော်နေ၏။
`ညီမ စားချင်တာတွေ ဈေးတန်းထဲ လိုက်ပတ်စားလို့ ရပြီ´ ဆိုကာ ပျော်နေခြင်း ဖြစ်လေသည်။

`အကိုတို့ ကော်ဖီနဲ့ ကျွန်တော်တို့ မုန့်ဟင်းခါး လဲစားရအောင်´ ဆိုကာ မုန့်ဟင်းခါးတွေ လာပို့သွားသူများ၊ ရှိသလို...
`ပူတင်း ဆနွင်းမကင်းတွေ လာယူတာ၊ ဒီမှာ အမတို့ဆီက မုန့်တီသုပ်တွေ လာပို့တယ်.. ကောင်းမှကောင်းပဲ´ ဆိုသော အမတွေကို မျက်နှာပူပူနှင့် `ဟီး.. ကော်ဖီ၊ လဖ္ဘက်ရည်ပဲ ကျန်တော့တယ်..၊ မုန့်တွေက ကုန်ပြီ အမရေ´ ဟု အားနာနာနှင့် ပြန်ဖြေရတာတွေလည်း ရှိသည်။

`ဒီက အကိုက ကျွန်မတို့ဆီက အကြော်တွေ ခဏ၊ ခဏ လာယူတယ်.. ကျွန်မတို့ကို ကော်ဖီ ပိုဖျော်ထည့်ပေးရမယ်... ဒါပဲ´ ဟု လာ လာ နောက်သော သူများ..၊ အားလုံးက မသိကျွမ်းဖူးကြပေမဲ့ တစ်စိတ်တစ်ဝမ်းတည်း ပျော်ရွှင်ရင်းနှီးနေကြပြီ..။

`ဟောဒီက ရွှေရင်အေး ချိုချိုမွှေးမွှေး အေးအေးလေးတွေ ရမယ်နော်´ လို့ ဘေးဆိုင်က အော်တိုင်း ကျွန်တော်တို့မောင်နှမတွေထဲက ဖိုးအော်ချင်နှစ်ယောက်က `ဒီမှာလည်း ကော်ဖီ၊ လဖ္ဘက်ရည် ပူပူနွေးနွေးလေးတွေ သုံးဆောင်နိုင်ပါပြီခဗျ´ ဟု အပြိုင်ထထအော်လေတော့ ရေနွေးမလောက်လို့ စောင့်၇သော လူတန်းက ရှည် ရှည်သွားရသလို အဖျော်ဆရာတွေလဲ ချွေးပြန်ကာ အမောဖောက်အောင် ဖျော်ရ အော်ရလေသည်။ သူတို့အော်သည်က `ဟေ့ရောင်တွေ.. ရေနွေးဆူမှ အော်ပါဟ အော်ကောင်းတိုင်း စွတ်ရွတ်အော်မနေနဲ့၊ မင်းတို့ လူခေါ်ကောင်းတာနဲ့ အဖျော်ဆရာတွေလဲ အမောဆို့တော့မယ်´.. အော်သာအော်သော်လည်း အပျော်အပြုံးတွေနှင့်သာ...။

ဘေးက ကြာဇံကြော်မှာလည်း လက်မလည်အောင် အိုးကြီး အိုးငယ် အသွယ်သွယ်နှင့် ကြော်နေရသလို... ၊ ရွှေရင်အေးအဖွဲ့မှာလည်း အိုးကြီး လေးလုံးနှင့်အပြည့်ကို နှစ်နာရီ သုံးနာရီအတွင်း ကုန်သွားလေပြီ။

ကျွန်တော်တို့တွေလဲ.. မုန့်ဟင်းခါး၊ ကြာဇံဟင်းခါး၊ ရခိုင်မုန့်တီ..၊ တိုဟူးသုပ်၊ ဆမူစာသုပ်၊ သီးစုံအအေး တွေကို... လာ လာပို့တာ စားလိုက်၊ ဈေးတန်းပတ်ကာ စားလိုက်ဖြင့် ဗိုက်ထဲ စုံပလုံ စိနေကြ၏။ ကျွန်တော်ကတော့ ပြဇာတ်နှင့် အငြိမ့်ကိုလည်း အားလျင်အားသလို ပြေးပြေးကြည့်ကာ ဓာတ်ပုံရိုက်ထွက်လိုက်သေးသည်။

ပြဇာတ်နှင့်အငြိမ့်ကလည်း အားပေးသူ ပွဲကြည့်ပရိတ်သတ်များသလို ကျွန်တော်တို့ မြန်မာ့ရိုးရာကိုလည်း လှစ်ဟပြနိုင်သည်မှာ ကျေနပ်စရာ ကောင်းလှသည်။ တစ်ချို့သော သူများ စည်းကမ်းမဲ့ စွန့်ပစ်သွားသော အမှိုက်တွေကို ဝေယျာဝစ္စ အဖွဲ့သားများက လိုက်လံ သိမ်းဆည်းနေကြသောကြောင့်လားမသိ.. လူ အတော်များများက အမှိုက်တွေ ပစ္စလက္ခတ် မပစ်ကြတော့ချေ။ ပွဲလာသူအားလုံး စည်းကမ်းသေ၀ပ်စွာ၊ ယဉ်ကျေးလိမ္မာစွာဖြင့် ပျော်ရွှင်နေကြသည်မှာ.. အပျော်လှိုင်းတွေ စုကာ ဆင့်ကာ ကျေနပ်စရာ၊ ပီတိဖြစ်စရာ ကောင်းလှသည်။

မိုးတွေ ၀ုန်းဒိုင်းကျဲကာ ရွာချလိုက်သော်လည်း လူတွေက အပျော်အပြုံးမပျက်.. လွတ်ရာ ဈေးဆိုင်တန်းတွေထဲ ပြေးဝင် မိုးခိုကာ မိုးတွေ သည်းလာလိုက် `ဝေး´ ခနဲ စုပြုံအော်ဟစ်လိုက်နှင့် အပျော်တွေ မပြတ်တော့ချေ။ မိုးစဲသွားတော့ ဈေးတန်းတွေလဲ လူတွေ ပြန်စည်လာသလို ကျွန်တော်တို့ အဖျော်ဆရာတွေလည်း လက်မလည်အောင် အလုပ်များကြရပြန်သည်။ (ကျွန်တော်ကတော့ ပါးစပ်ရော လက်ပါ မအား.ရတော့ပါ။ . ကင်မရာကိုင်ကာ လိုက်ရိုက်လိုက် ဆာလာလျှင် မုန့်ဝင်စားလိုက်နှင့် ပွဲဈေးပတ်နေသောကြောင့်ဖြစ်သည်။)

ညနေ သုံးနာရီထိုးကျော်တော့မှ ကျွန်တော်တို့လည်း ဆိုင်သိမ်းပြီး ကထိန်သင်္ကန်းပရိက္ခရာရှစ်ပါး ကို သုံးစုံ ကပ်လှူကာ ပြန်လာခဲ့ကြသည်။ အပြန်လမ်းတလျှောက်လုံး ပွဲဈေး အတွေ့အကြုံများကို သူ့ထက်ငါ လုပြောကြရင်း အပျော်တွေ စားမြုံ့ပြန်လာခဲ့ကြသည်။




ဒီ တန်ဆောင်မုန်း လပြည့်မှာတော့ ဒီကျွန်းကလေးသည် ထင်မှတ်ထားတာထက် ပိုပျော်စရာ ကောင်းသွားခဲ့ပါသည်။ (အဘယ်ကြော်င့ဆိုသော်... ::)))... ဆမ်ဘာဝမ် ပန်းခြံထဲမှာ ကျင်းပသော (၂၀၁၀) ဆမ်ဘာဝမ်း တန်ဆောင်တိုင်ပွဲတော် စတုဒိသာကျွေးပွဲမှာ ကျွန်တော်တို့မောင်နှမတတွေ စုပေါင်းအလှူလေးတစ်ခု ပျော်ရွှင် အောင်မြင်သွားခဲ့သောကြောင့် ဖြစ်၏။ ပျော်ရွှင်ဖွယ်ရာ နေ့လေးကို ကျွန်တော်တို့နှင့်ထပ်တူ ပျော်ရွှင်ကာ သာဓု ခေါ်ကြည်နူးကြစေဖို့ မျှဝေလိုက်ရင်း အချိန်အကြာကြီး ဖုန်တက်နေသော အိမ်ကလေးကို ကုသိုလ်မှုလေး တစ်ခုဖြင့် ဆေးပေါင်းခတဲ့ညမှာ အမှတ်တရ တင်လိုက်ခြင်းလည်း ဖြစ်ပါသည်။



နောက်ဆက်တွဲ သတင်း

လာမည့် ဒီဇင်ဘာလထဲမှာ ၇န်ကုန်မြို့ ဝေဘာဂီဆေးရုံရှိ အေအိုင်ဒီအက်စ် ဝေဒနာရှင်များအတွက် စုပေါင်းအလှူတစ်ခု လုပ်နီုင်ဖို့ စီစဉ်နေပါသည်။ အလှူငွေ ထည့်ဝင်လိုသူများအတွက် ကြိုတင်သတင်းကောင်း ပါးထားရခြင်း ဖြစ်ပါကြောင်း.........

မေတ္တာဖြင့်
မိုးကုတ်သား