ဒီဇင်ဘာ

"ပျင်း တယ် ကွာ.... ကဗျာ တစ်ပုဒ် လောက် ရွတ် ပြ ပါ လားး "

ရေကန် နံ ဘေးက ခုံတန်းလေးမှာ အတူ ထိုင်နေရင်း ဘာ စိတ်ကူးကြောင့် မ က တောင်းဆိုလိုက်လေသလဲ ကျွန်တော် စဉ်းစား မရ။ မရဲ့ သွယ်လျလျ လက်ချောင်းများနဲ့ ပုံဖော်ထားတဲ့ အရောင်စုံ လက်သည်းလေးတွေဆီ ငေးနေမိတဲ့ ကျွန်တော် ဘာကြောင့် ရွတ်ခိုင်းတာလဲ အဓွန့် မတက်ရဲ ။ ဒီတော့ မ အလိုကျ ကဗျာတစ်ပုဒ်ကို ရွတ်ပြမည် ကြံတော့ နှုတ်ဖျားက မရည်ရွယ်ပါပဲ ထွက်ကျလာသည်က ဆရာ တာရာမင်းဝေ ရဲ့ ကဗျာ တစ်ပုဒ် ဖြစ်လို့ နေခဲ့သည်။

" နိုဝင်ဘာ "

ငါ့ရဲ့ ရွှေအိပ်မက်ကို

ခြေကျင်းတွေလို ခွဲစိပ်ဝတ်ဆင်ထားတဲ့မိန်းမ

မြူခိုးနီညိုတွေကြားမှာ စပယ်ကပိုကရိုနဲ့ ... လှလို့။

ငါ .. တစ်ပွင့်ပြီးတစ်ပွင့်ပြိုလဲ

နှင်း အဆက်ဆက်တိုင်အောင် ကြေကွဲခဲ့ရပေါ့ ။ ။

တာရာမင်းဝေ ၁၉၉၅၊စက်တင်ဘာ၊ဟန်သစ်

"ဒါဆို မ အတွက် ဒီဇင်ဘာနဲ့ ပတ်သက်တဲ့ ကဗျာ တစ်ပုဒ် ခု စပ်ပြီး ရွတ်ပြ ကွာ"

မ က သူမ၏ ပါးချိုင့်ကလေးများ ပေါ်လာသည်ထိ နှစ်လိုစွာ ပြုံးရင်း ပြောလာတော့ ကျွန်တော် ခေါင်းစားရပြီ။

"ဘာ ခေါင်း ကုတ်နေတာလဲ၊ ခု ရွတ်ပြ ဆို...."

"ဟုတ်ဘူးလေ၊ မ အတွက် ကျွန်တော့်ရင်ထဲက စာတွေကို စီနေရသေးတယ်"

ဒီလို ဆိုပြန်တော့ မ က ခလေးလေးတစ်ယောက်လို ငြိမ်သက်စွာ သူ့ ဆီက ထွက်ကျလာမဲ့ ကဗျာကို တိတ်တဆိတ် စောင့်လို့...။
ကျွန်တော့်ဘ၀ တစ်ခုလုံးကို အနိုင်လိုချင်တတ်သော၊ ကျွန်တော့်ပျော်ရွှင်မှု၊ ၀မ်းနည်းမှုတွေကို ကပြောင်းကပြန်ဖြစ်အောင် လုပ်နိုင်စွမ်းသော မ အတွက်တော့ ကျွန်တော်သည် မ၏ သက်ရှိ အရုပ်လေး တစ်ရုပ်သာ။ သို့သော် မ ပျော်နေတာ မြင်နေရလျှင် ကျွန်တော် ကျေနပ်ပြီ။

" ဒီဇင်ဘာ "

ကျွန်တော့်ရဲ့ အနာဂါတ်တွေကို

သူ့လမ်းတွေလို ဖြန်းခင်းခဲ့တဲ့ ချစ်သူ

လူထူထူ တိမ်တိုက်ကောင်းကင်မှာ
သက်တန့်တစ်စင်းပမာ တောက်ပရွန်းမြလို့....

ကျွန်တော်.. တစ်လွှာပြီးတစ်လွှာ ကြွေကာမှ
သူက..
နှင်းတွေကို..တစ်ရောင်ပြီးတစ်ရောင် ဆေးခြယ်နေတော့တယ်။ ။

မိုးကုတ်သား

ကျွန်တော် ကဗျာရွတ်လို့ ပြီးတော့ မက ပျော်ရွှင်စွာ ရယ်မောလိုက်သေးသည်။

"နှင်းဖြူဖြူတွေနဲ့ တလောကလုံး အဖြူရောင်တွေ ဖုံးနေရင် ပျင်းစရာကြီးလေကွာ၊ မ က လောကကြီးကို အရောင်စုံစုံနဲ့ မြင်ချင်တာ"

"မ သဘော အတိုင်းပါပဲဗျာ"

ရွှင်ပျနေသော မ မျက်နှာ ငွေလကို ငေးကြည့်ရင်း ဒီကနေ့ မဆီက အဖြေတောင်းဖို့ စိတ်ကူးလေး ပျက်သွားရပြန်သည်။ မ အချစ်ကို ရဖို့ရာ ကျွန်တော် နောက်နှစ် နောက်နှစ် ဒီဇင်ဘာ ဘယ်နှစ်ခုတိုင် စောင့်ဆိုင်းရမည်လဲ၊ ကျွန်တော် စောင့်နိုင်ပါသည်။
" မ " ပျော်ရွှင်ပါစေ ။ ။

မေတ္တာဖြင့်

မိုးကုတ်သား